Kan mamawh ta!
A hre deuh ho in (a fing deuh ka ti lo ania!) hmai zangthal há in min rawn kalh chilh leh chat chat anga,ka ngawi leh kur emaw ani anga. . . . Kei mi tawnghmang thiam lo hi!!
Lammual leh hmun dang danga "ram leh hnam damna atana tawngtai" hian engtikah mah ram ropui min thlen dawn lova,min thlen ngai hek lovang. Tawngtai ka ngainep emaw,thil a ti thei lo e ka tihna erawh a nilo. "Dil rawh u;tichuan an pe ang che u" ti mahse "Thawk peih lo chuan ei pawh ei suh se" a ti ve tho a. Politician kohhran upa nilo kohhran upa politician kan neih hunah leh party politics kan kalsan hunah chauh kan tawngtai hi A chhang ang ka ti ngam sak.
(Kohhran zawng zawng huap in 'synod' tih hi ka'n hmang hawh lawk ange.)
Synod puipate leh kohhran hruaitute hi politics a lut tur in han ti chhin teh?? An treu hlar mai ang. Hmingchhiat an hlau tlat alawm. . . . Hmingthat chauh um rawngbawltu maw?
A chhan chu kan politics kawchhung a uih tawh tlat a,bible leh coat suit nen an luhchilh ngam lo ani mahna. Pathian trih mi in hruaitu hna a chelh hma chu Pathian trih mi hruaitu kan nei ngai lovang. Hlep ruk ching,sawi awihawm thiam thiam leh a sep rawtui thei thei in politics an khelh a ram an hruai chhung chuan thlaler ah kan la vakvai fo dawn.
Synod hnuaia thawk upa te,rawngbawltu Pathian trih tak tak te leh pastor,pro pastor thleng in;constituency tin hming kimin Pathian trih mi ram hruaitu tur candidate rawn list chhuak ta rup mai se!! Nu leh pa te anga party politics ruih chilh ve lo thalai hian ram leh hnam dam nana tawngtai chhan naah ngai in kan va'n vote nasa dawn em!! Assembly house ah tran hma in an tawngtai rual anga,wheel barrow ang maia thawm ringawt ring nuar nawr kal sawrkar kan nei tawh lo ngei bawk anga!! Fair tak,fel leh fai takin an ti ngei anga. Ram chu ava dam chak dawn em!! Khawihlipui chu a pawna damdawi hnawih ringawt lova a zang kan sawr chhuah tawh miau avangin kan híl suai suai reng ang chu mawle. . . .
Hmm. . . . Engtikahmah a thleng lovang! Office building leh quarter tha tak takah,kohhran mipui thawh khawm hlawh la in faisa an kang puak der der a. Hahdam hek! Jordan lui kha an rah chin chauh a kám a,a chãr sa ah an kal kai reng reng lo. Tawngtai ringawt a tawk lo;dai a ngai.
MPF kan dampui zo dawn lo. Synod (Mizoram Kohhran Hruaitu Committee) hian ram kalsiam a vei a,siamthat a duh tak tak anih chuan kum 20 chuang hruaitu khawi fin zawh loh tawngtaipui ai chuan hruaitu tha thehchhuak mai rawh se. Lalruanga pian a pian a ngai;sawngnawi hman a ni lo. Pian ruala sazu kaw lai nghal thei Van politics leh manifesto kan mamawh. Zawhte thing lawn ang maia dawm chhoh dawna trang tlat,pawh thlak dawna in ham tang tlat lawi si anga tuilairapa MPF/synod a kal chhung chuan Zoram politics hi a pui em em lem lo viau ang.
Politics/politician te hi kohhran miten kan en dan a dang tlat a;tun ami politician/MLA /minister te an thawh/tih dan in zir hek lo le! Thuthlung bawm zawn tu (synod/MKHC) in hma a hruai a, huh hlau lova Jordan lui luang an dai bawrh bawrh ngam hunah Zoram hian Jordan lui politics tui nu hi kan dai kai ve tawh anga,ramtiam Kanaan kan thleng ve thei mahna.
© Copyrights Reserved by C. Vanlalpekhlua
