ZAN KHAWHAR

A thim muai a,
A reh riai a.
Kãtchãt leh chumchi kamram thawm han bengchhit tur takngial pawh awm lovin;
Boruak lah chu a dai diai a.

Chhawrthlapui dê seki vúng pawh kawlkilah a uai lung lung a,
Suk chen lek liam nan a hmabak tawh a.
Van thengreng chu a de chiai vei nen,
Thlir ve teh! A mawi teh e!

Ekhai!!
Khi chu Chhohreivung ani chiang mai!
Enteh mah!!?
Zangkhua pawh Khiangte zawng zim bulah a bungbu kút kút anih roh khi!

Mahni tum tawk te te nen,
Mahni seh seh mualah in ti hlawm em ni?
In lungawi hmel teh e!
In van tual zauva mahni tlat tlata in han tlat hlawm takah chuan!

Mi en ula,mi han thlir ve teh u khai!!
Kan rûn thim riai bahzar ah;
Tuk chawp se dar tiat lawng thlanvawng perhkhuang nen -
"Hring dup" zai vawr ka la kham hlei nem le!

Lung mi len tu kei ang riang chhawrthla eng hnuaiah lo zawng-
Zai lai râwl vawr har in ka ring mang e!
Ka zuam love!

Kawlkil te u,
In kharkhip ula.
Vansang si ar te u,
Ka zai ngai teh hlawm u khai!
Kal lai kham rawh u - kawlkung a'n;
Chelh cham rih teh u'n. . . .
Chhawrthlapui kha!. . . .


© Copyrights Reserved by C. Vanlalpekhlua