HMANGAIH LEHKHATHAWN

Țhianpa,

A hlimna i ni dawn anih loh chuan ka
hlimna hi min laksak lo la, a tan engkim i ti huam anih dawn loh chuan ka kuangkuahna ata min chhuhsak suh; ka engkim a ni si a!

Amah i hmuh theih nan zan thim hnuaiah kawng i hriat ngai loh zawh i huam ve anih loh chuan a thinlung kawngka kik lo hram
la, a kianga i awm theih nana i ngaihhlut
ber berte i chân ve ngam anih loh chuan a
thinlung ruk sak lul suh la; kalsan che a tum
hunah mittui nen i ngen ngam ve dawn anih
loh chuan a mittui i tihtlak tam hma in
kiansan mai zawk ang che.

Chhungte tuithlar pawh huam hiala i
hmangaih ve ngam dawn te anih loh chuan
khawngaihin tunah bansan la, in inkar a chhiat
apianga ngaihdam dil tura i inphahhniam
thei dawn anih loh chuan a hmaah inlan lo
zawk ang che. I hmangaih zia entir nana mi
zawng zawng hmuh atan in pahnih thlalak
lanna hla i siamsak ve dawn lo anih chuan a
bulah awm reng tal ang che; a lunglen
changa a ngaihthlak atan tiin ka siamsak
asin! Lungleng turin thlahthlam suh ang
che.

 

© C. Vanlalpekhlua

Thu mawi leh nalh pawh ani kher lo thei; atan i theihtawp hmangaihna thuziak
ziah sak thin la, a thlalak paw'n i Facebook
profile chei mawi ngei rawh se! Hmeichhe
duhawm tak a ni si a.

Hlawhtlinna a chan changin lawmpui la, a
hlawhchham leh beidawn ni alo thlen chuan
fuih fo ang che. A tan beiseina ni la, i nun
hmathlir leh ruahmanna apiangah tel zel
rawh se. Hmeichhia a ni a, ngaihsak reng
bawk ang che. Amah chauh nangmahah
awm sela, midang leng ve suh se.

Dai țhelh chang emaw, rah pelh palh chang emaw a
neih hunah a kut chelh la, a tlu anih chuan
kaitho țhin ang che. I kaitho zo lo anih
erawh chuan a tlukna hmun hmuna țhingțhit
pui a, a din chhuah hun nghak hram hram
turin ka beisei bawk che.

A nunhlui vanga khawhar leh inchhira a
mittui a tlak ni chuan hma hun duhawm tak
suangtuah pui la, liam hnu ngaia a țah zan
alo thlenin kuangkuah hle hle ang che. A
hnawl hnu kianga let leh duhna rilru a put
phah na tur khawp hialin a rilru tirethei lo la, a
thinlung tiruak hek suh ang che. Sawi lo
mahse zantin i pangtilum nghenga mut a
thlahlel dawn a, a thlamuanna ni reng ang
che.

A tawp berah chuan amah aia țha emaw,
midang duh zawk emaw i neih hun alo thlen
chuan ka tan hmeichhe duhawm ber ala ni
fan tih hrilh la, ka hnena a rawn let leh theih nan thlah zalen hram ang che. A rawn let leh mial mahna tiin beiseina beidawng tak nen ka lo nghak anga, ka lo thlir reng dawn si a...

Heng zawng zawng hi ka ngen che a,
thil pakhat erawh ka hriattir ang che :

I tina emaw; a mittui i tiktla emaw anih
chuan, chumi ni la la chuan ka hmachhawn ang
che.