Pawl 5 kan nih kum khan Zotlang ațangin kan madam fapa hi kan sikulah a rawn lut thar ve a. Mithar, hmelhriatloh tih takah kan han zuam nghal em em khawp a! Sikul bang te kha kan han kick vel a, kan invawrhbin thul! Kan lo in la turu nasa! Khami ni kha Vala Hrahsel ka hmuh hmasak ber ni a ni.
A hnuah chuan kan inkawmngeih leh ta phian a! Chhunah, lunch break lai hian kan inah kan haw țhin a. Zinga nutrela kan hmeh, tlem lo la bang te nen khan chhun chaw kan ei puar el euh țhin. Țumkhat chu kan tuala April par (May flower) kung; a zar pakhatah hian kan uai kan uai a, a rawn bal thut mai a! Kan chhungte hriat kan hlau si; kan thliak sawp nuai a, kan thukru ta ringawt a!
Middle sikul kan kal chhung khan pakhatna ka ni țhin a, ani pahnihna. Kan in el țhin a, ava'n nuam ve thei tak! Kan venga phone a rawn awm tirh hian PCO angin a hman theih a. Phone la hmang ngai lo tih takah ka hmang ve chhin chak ta tlat anih chu! Rem kan ruat dun a, tlai sikul bang in a thlen veleh min rawn phone ang tiin kan intiam a. Khami tlai khan PCO neitute in bulah ka tei khawtlai ve țhak bawk a. Kan inbiak ve ngei kha! Phone a ka biak hmasak ber chu he Vala pui roh hi a ni ta!
High school kan kal hnuah chuan sikul luhna alo in ang talo nen; kan inhmu khat ta deuh. Higher leh college lamah kan lut chho a, kan lo puitling ve ta deuh a. Facebook lama ka thuziak te alo chhiar ve țhin a, min fuih ve reng țhin.
A damloh tirh khan ka hria a, ka kan lem hlei lova! A reh vang vanga, a dam țha turah ka lo ngai ngawt a. Tunah, a thih thu in min rawn deng ta thut mai! Mi a țhawng takzet...
Vala, heti maia i kal ta thut hi hriatthiam har ka ti khawp mai. Van khian vantirhkoh a mamawh viau em ni ang le? Hmabak leh hmachhawp tam tak ila nei asin... I nu leh pa, i unaute leh i țhiante i tihrilhhai hle mai!
Engtikah emaw chuan i awmnaah kan la rawn kal ve anga, middle sikula kan lo welcome dan che anga min lo thungrulh ka ring tlat pek anih chu! A atthlak tiraw? Val, van khian PCO a nei anih chuan vawikhat tal min rawn phone leh dawn nia aw? Ka ngai ngawt ang che!
