Mi tam ber hian Isua hi kan kianga awm turin kan duh a, kan zinkawnga min țhutpui turin kan beisei a. Ni e, Isua nen kan chuan tlan avangin kan nun a kaltluang a, biboh leh țițoh awm lovin kan tlan pur pur a.
Kan tlanchak zel a, kan chuanna motor chu kan thunun theih phak bak thlengin a tlanchak ta sauh sauh a! Theihtawpin thunun kan tum a, mahse kan lo tlan tluan em avangin a speed a chak lutuk tawh a, chuti maia thunun awlsam a lo ni tawh si lo! Tluan lutukna chuan dinhmun derthawngah min dah a, mihring theihna leh chakna zawng zawng a hlawhchham ta! I hmabak a chiang; thihna!
Aw! Tlai-ngai-lova hi a tlai teuh thei ther ther ani tiraw?! I kianga Isua lah chu a reh hmak bawk si a?!! I buaina chinfel pui turin a che mai silo; enteh, Pathian mak zia hi! I motor thununna steering i chelh chhung chuan chet zu han tum hauh lova! Mangang leh beidawng tawpa i auh pawhin a bengchhet țhut hmak thei nia! Lawngah pawh khan a pil țep thlengin a muhil thei tlat; Amah ngei pawh a chuang ve reng tho sia! A hmangaih Lazara; thih suala a awm lai pawhin a cham khawtlaia, zualko thawm in a den hnuah pawh ni li lai a la cham thei cheu ania!...
I beidawng ta! Theihtawp i chhuah a, engmahlo a chang zo a. Mittui far tur awmlo hialin i inbunruak tawh a, i tlu bawkkhup ta! Tho turin chakna i nei ta lo! Mahse, accident i hlauh em avangin; thei leh thei lovin motor steering ila chelh tlat thung si!
'Jesus take the wheel!
Take it from my hands..
Cause I can't do this on my own;
I'm letting go!
So give me one more chance;
Save me from this road I'm on...
Jesus take the wheel...'
Take it from my hands..
Cause I can't do this on my own;
I'm letting go!
So give me one more chance;
Save me from this road I'm on...
Jesus take the wheel...'
A thiltihtheih zia lantir na'n steering kha a mamawh a lo ni a! I nun khalh ngil leh tura i sawm lai khan puih che chakin a thaw dep depa, mahse a steering i chelh tlat si! Engkimtitheia chu engmah ti thei lovin i awmtir reng țhin a lo ni a! Enteh, Isua hi kan kianga țhu tur ni lovin a driver tur zawk a lo ni a! Kan tum ram hi keini aiin a hrechiang a, a in kalkawng anih miau avangin kawng chanchin a lo hrechiang ber zawk a lo ni a! A duhdan taka khalh tura driver seat i ken hunah; a steering a chelh hnuah i motor chu a thunun anga, thihna kotlang hnaih lovin zinkawng kan zawh thei tawh tur a lo ni zawk a!
Drugs vangin i beidawng tiraw? Hmangaihna vanduai vangin damchhan nei lo angin i inngai țhin em? Thlahthlam leh nawrbeh tawkin manganna vawrtawp i khum mek em? I tihsual in a vuak let che i tuar mek a, i hmabak thlirin i zam hle tiraw?! I vawn apiang a chim a, i rah apiang a bal a. I nghenchhan apiang a tlu a, tluk leh tlak fawmin i pai țawk țawk a. I va han khawngaihthlak tehlul em!...
Enteh, i nun khalh ngil i tumna steering kha Isua chelh tir la, a driver seat kha kian la. A duh dan dan in khalh ang hmiang; Isua'n khawi hmunah nge a hruai thlen che i rin? Hmun pakhat, thlahlela i zawn țhin bak kha hmundang a pan pui che i ring em ni?!
Isu, nangin khalh ve tawh rawh!