Vawikhat i piang a, vawikhat thih i hmabak nghal! I hun tawpah chuan i hming leh i chanchin ziakin an sem anga, i damchhunga thil i tihte chu i pianni leh i thihni inkarah thai-phei pakhat lek hmangin an ziak zo vek ang! Chu chu a ni; hringnun chu! Thai-phei pakhata ziah zawh vek theih a ni!
Vawiin hian thil pakhat sawi ka duh; beidawnna ruama i luh lohna tur leh chapona tlang i chuan loh na'n ''MAHSE'' nun ka hrilh dawn che.
A hmasa ber atan chuan - i beidawnna hmunah khan chau hlen suh. Sulhnu neilo mihring kan awm lova, sulhnu phuai leh vuai; tluk leh tlak fawma kan vahvaihna khawvel chanchin hi mite hian ngaihnawm leh sawi nuam an lo ti khawp a!
I chau tawh em? I beidawng ngai em? I tisual fo țhin em? I na mek tiraw?
Mahse...
Hmalam en la, i chakna kha ring ngam rawh. Dak chhuak la, i hmathlir chu tipuitling teh khai! Chau i inti em ni? Tam tak i thawh tawh vang anih kha; i thawk zo țep tawh asin! I beidawng em ni? Miropui leh thil ropui titute hian beidawnna ruam an paltlang vek asin! I thlen hun an nghak che; i bei leh dawn lo'm ni? I tisual țhin tiraw? Tihsual nei ngailo mihring hi khawvelin a hrereng ngai lo; thil hmuhchhuah ropui ber berte hi tihsual palh ațanga lo piang an ni asin! I tihsual kha i dikloh a nilo; a theih loh dan kawng hran i hmuchhuak a ni zawk! A eng zawngin thlir la, a chhanna dik lamah in sawr zim sauh sauh teh khai!
I vawn apiang a chim a, i rah apiang a bal a. Khup pilh leh pem hialin i tlu a, luhlul ila chhuah ta fo a! I nun hmanmek leh i khawvel chu harhfim a hmachhawn tlak loh hial khawpin i hmu a, pangngailo taka awm chu thil engkim a pangngai dan ber niin i hre leh ang lawi a!
I tihsual leh a chhan sawi turin i huaisen tawk lova, i dang a âwk zel a. Hlim luih i tum a, seih i der a. I țawngkam leh awrawlte chuan i nun lemchan thlawp țhin mahse i mittui erawh in a phatsan che leh țhin si! I nui lui thawm ri karah khan beidawnna rum ri ka hria a, kha mitmengah
khan țanpuitu nghakhlel tak ka hmu asin!
Thih i chak a, intihhlum meuh erawh i ngam si lo! He khawvelah hian mahni chauha vahrawlaih rek rek i chak a, I țhenrualte i vela an awm lai ngei ngei paw'n mal ngawih ngawihin i inhre lawi si! I duhthusam leh i suangtuahnate chu a inhal tlat a, tuilairapin an siam che a.
I pawnlam landan i thlir a, i țo chhuahna kung i en a, "Hetiang tur hi chu ka nilo!", i ti a. I nihna pawm har i ti a, i lemchan nun chu nangmah ngeiin i dem a, kawng dang I hre si lo!
I țawngțai lohna chin pawh i hre ta lo! I khumah I inngaihtuah lungpuam a, lukham hnawm chap in mittui nen zan i tumtawi tawh țhin. Hetiang nun teh hrep hman reng hi i hne a, dam khawchhuak turin i nun hram hram a ngai thung si!
Mahse...
Dak chhuak la, dil rawh. Fa tak zilhhauna ani; i chunga A lek hi! I nu leh pa hnenah i duh leh mamawh dilna lehkha felfai takin i thlen ngai lo; an hmangaih che tih hriaa i ngen chiam avangin an tihsak țhin che. Hmangaih tawp lova entu che khian dil dan mawi A thlir lo; i ngen chiam chuan A pe ang che. A fa duat i ni miau alawm! Bul țan dan tur I hre lo a, i khawr ru riau tiraw? I mit chhing la, van lam en la. I thil duh ber chu sawi la, "Ka pa, van ami, chu chu ka duh e", ti ang che.
Engtik ni ah emaw chuan i chungchang sawiin an la titi anga. Chumi ni chu vawiin a ni thei a, naktuk pawh a ni thei. Nakum emaw, i dam lai ke luma he leilung i rah tawh ngailoh hnuah pawh a ni thei. Engtinnge i chanchin sawi bul an țan anga, eng țawngkam nge an hman ang tih hi thil pawimawh a ni ber lo. A pawimawh ber zawk chu; engtinnge a tawp an khar tih zawk hi a ni reng fo ang.
I thiltih țha te, i nundan mawi te, i pianhmang mawina leh i hausaknate chu chilthli tla lo chauha ngaihnawmin sawi mahse, 'mahse' ti a chhunzawmna ngaihnawm lo tak a awm hlauh chuan awhawm i ni ngai chuang lovang!
Tlangval, ilo inpal hnawk țhin a ni thei e. Nula, i thangtlawm tawh pawh a ni thei. Mahse, vawiin hian i nuna thilpawimawh ber ti turin ka ngen dawn che. He thu i chhiar zawh hian 'MAHSE' tiin duhtawk la, nun hlui kalsanin 'mahse' piaha i thawnthu thar tur chu ziak ta che?!!
I sual țhin; mahse, i sim tawh dawn!
I rui țhin; mahse, a reh tawh dawn!
I beidawng mek; mahse, i bei leh dawn!
I chau tawh; mahse, i chak ngei dawn!
I na; mahse, a dam leh dawn!
A tirah chuan harsa i ti ang!
MAHSE, i thei tih ka hriatchian tluk zetin i inhrechiang!
© C Vanlalpekhlua
