Bus lah chu a rawn thleng har hrep a! Kan kawngpui zim sa nak alaia lirthei tam lutuk hi chu ka haw thar hlur! Horn lah chu an pe sek lehnghal...
Bus rawn thleng hmasa berah chuan ka lut vat a, kawngka bula Smart Card Scanner lo vitu Bus Monitor; la naupan hmel tak chu chu melh rawm rawm pahin, "In timing hi vawng uluk deuh rawh u; kan tlai phah lek lek fo alawm!", ka'n tih khum hlak hlak a. Bus Monitor chuan a ngaihna hrelo zeta min thlek hu pahin, "Kan tihpalh a ni e Ma'm; Theihtawp kan lo chhuah lehzual dawn nia" , a ti bah deuh niai a. Ka card a scan chu min pe let a.
Diktak chuan kalna tur leh tihtur pawimawh em em ka nei pawh a ni hran lo! Nulat rei tawh lamah hi chuan engemaw hlekah mood a off in kan lo țawng leh țeuh țhin! Haha.... Zep loh chuan țhenkhat hi chu in ni ve tho ang! :D
Seat lah chu pahnih chiah a la awl zui; ka hnung chiaha tlangval zu rui rawn lut ve nghal ka hmuh rual chuan seat lo awl hmasa zawk chu ka țhut hmak a, min melh zuk zuk pahin ka hnunga țhutna awlah chuan a va țhu ve a. Min biak tum ni awm takin a ang zuau a, mahse hre lo awm ang deuhin ka earphone chu ka vuah țha sauh sauh a, hla ka ngaithlak san hmak! Bus chhung lehzela hmelhriat pawh nilo inbiak sek hi ka peih ve lo; ka hne tlat zel!
Kan veng kawn kan thlen chuan ka tho nalh a, Smart Card scan pah chuan Bus Monitor chu ka'n melh rum leh hram a! An tlai tehreng nen; zu rim nam bula min țhuttir vang hrim hrim pawh khan hauh deuh chu a phu ve alawm le! Ka hnunga țhu tlangval chuan Smart Card a nei ve lo nge; pawisa nawi a pe nawk nawk lai chu ka mitsir thei reng a.
Kawngsira kalte chuan min thlek leh deuh hu hu țhin hlawm a, nuam ka ti chiah lo. Ka enge diklo tiin ka inthlek ru ngial a, diklo a awm bawk silo a. Ka confi lo ru kher mai!
Ka hnung lam ațang chuan ka darah min rawn kuai her dawrh a, confi loh nen; ka ke chheh buaiin ka tlu dawn ta mai! A rem rem chu ka vai nawk nawka, Mall a ka thil lei ka khai pawh ka thlauh daih!
Tlangval zurui-a chuan min rawn pawh thawh nawlh pahin ngaihdam min dil chul a, miin min en țhup lo se chuan ka beng luhai sawk ngei ang! Thinrim taka insiamțhat mawlh mawlh pah chuan ka thil lei chu chhar mai ka'n tum a. Lalpa leh!! Ka thil khai ațang chuan zu um keh leh zu bua chu a rawn dir chhuak tluah tluah mai! Ka va zak tehreng! :p
Tlangvala melh rawm rawm pah chuan,"He'ng hi ka lei a ni lo hrim hrim! Ka bag min thleng ani maw?" ka ti ngal ngal a. Tlangvala chuan,"Bus nghah naah khan ka thil lei zawk hi i la a, rawn pek leh che ka tum khan i thinrim hmel sia, ka be ngam lawk lo che a. Nichin, bus ațanga i chhuk hnu khan rawn pek che tumin ka rawn zui che a. Ka koh vak vak che pawhin i hre thei silo a" tih pah chuan a bag khai lai chu min rawn pe a.
Mawla! Khawlaia miin min en hrek hrek ka tih kha min lo auh vak vak vang a nimaw? Kei lah earphone vuahin ka kal lawh lawh kha ania! Ka zak leh hnuhnawh!
Miin thilmak ena min en tam hmain kalsawn vat a ngai ani! Mahse, zurui-a hi engtin nge ka tih dawn aw?!.. A zu ka tihkeh man ai tak hi chu ka pek ve ngei angai awm sia :/ Hmm.... Taxi phar ila, kalsawn phawt ang. Duh leh ka inah rawn kal ve se, rilru țhalo a put vaih chuan Chilli Spray ka neih tho kha maw....
Ka inluah lam pan chuan taxi chu kan la dun ta poh a; ka hnar ka hup tluan țhak! A zak ve det ang!
Khi khi Lalchhanchhuaha (Tetea) nen kan inhriat țan dan chu a ni! A romantic lo ber awm e! :D
A tira ka ngaihdan ang ngawt kha alo nilo tih ka hre chhawm ta zel a, kan inkawmngeih ta phian mai! Zan lamah tlaivarin bungraw thiar leh sengfel hna a thawk țhin a, chu chu a tukah a sem kual leh a. Chawhnu lamah chawlin zan dar 8 ah a kal leh țhin. A hnaah a rinawm a, diklo leh felhlela a awm chu sawi loh; hun a vawndik loh pawh ka la hre lo! Zu in a hrat e tih mai loh chu sawiselna tur ka hre lem lo!
Zu in tawh lo tura ka tih chang chuan a nui mai a, ka mita min en chungin,"Sangte, ka mamawh alawm!" a ti mai țhin. Sawichhuah duhloh engemaw tak a pai niin ka hria; a chang chuan hmeichhe pakhat - "Amawii" hming lamin a țawngvai leh nawk nawk țhin; tunge Amawii tih chu ka zawh lahin a hriat bik loh thu in min chhang mai zel a. Ka awih lem hlei lova!
Thla 6 dawn kan inkawm hnu chuan kan inhrechiang tawh bawka, a thuruk pawh min hrilh ngam ve ta! A mita mittui tling pam chu ka hruk hul sak a,"Tete, Amawii chu dem viau tur ka nih laiin i phal tlat bawk silo a. A chang chuan thil zawng zawng hi kan ruahman leh kan duhthusam ang diak diakin a thleng bik hleinem! Ani chuan midang a pan tawh a, nang pawh hmasawn tum ve tawh ta che?!" ka ti sep sep a.
"Tete, thil kan thlak danglam theihte thlak danglam ngam leh kan thlak danglam theihloh pawm thiam theih hi kan chakna leh hmasawnna kailawn ber an ni a, chu'ng thil pahnihte danglamna hrethiam thei tura Pathian hnena kan țawngțai tam hi a pawimawh lehzual asin!"
A zu no chu a tlak pawp a, ka mita min melh kar pahin,"Sangte, ka kuah thei che angem?" a ti sap a. Ka chhang lo; ka kuah a, a mittui in ka dar a far fap fap chu ka feel thei nia! Ka țah a chhuak deuh thut a, ka bag lak pahin ka tho hluai a. A khuma muttir pahin ka mangțha sap a, ka chhuak ta daih a.
Hmeichhe rinawmlo vanga a tawrhna hi ka dem lova, phatsan a nih vanga a kehchhiatna hi ka hmuhsit phah hek lo. Mipa diktak chuan a hmangaih a theihnghilh thei tawh ngai lo tih ka hriatchian vang leh hmangaihna dik ka zah vang tal pawhin Tetea bawkkhup lai hi ka nuihzat a thianglo; ka kaitho anga, a kal leh ang!
Thla 6 dang a liam leh a, Tetea chu a tlachhia a ni tawh! Hna ațangin a bang a, inluah man a pek theihloh vangin awmna tur a neilo a. Ka chhungte lungsi lo chung leh țhenawmte mak tih hlawh huamin ka inah ka hruai lut a, ka pa phei chu ka ina rawn kalin kan inhauh phah nghe nghe. Mahse țha takin ka hrilhfiah a, nulat-tlangvalna lam thil anih loh zia leh Tetea chungchang zawng zawng ka hrilh vek hnu chuan dam takin a haw leh ta zawk a. Ka chhungte nena min lo țawngțaipui tur thu in min thlah hial a, Tetea chuan a hre ve lo thung.
Tetea chu zu tel lovin a awm thei tawh lova, a in loh hlek chuan a chiri a. Mangang baklengin zu leitur ka zawng kual leh zak zak țhin bawk a. Harhfima a awm lai chuan Bible te chhiar sakin ka theihtawpin kawm hlim ka tum țhin a, keimah zawk chuan ka hlawkpuiin ka nunah thil thar ka zir chhuah phah nasa hle.
Tukkhat chu Tetea chuan ka mutui lai min rawn kaitho a, khunkhan takin inbiak a duh thu min rawn hrilh a. Thingpui in pahin a thusawi chu ngun takn ka ngaithla a, a hmelah chuan zu nghei a duh takzet tih chu a chhiar theih hial mai! Eng vanga zu nghei tum ta thut nge anih ka zawh lahin a nui vur vura, a sawi duh lehpek lo! A chiri dawnah chuan min hrilh leh awm tho e... :D
Nidangah chuan zu um 1 ka hnutchhiah a, hnathawk turin ka kalsan mai țhin a. Vawiin ațang chuan hna hautak tak kan hmachhawn dawn bawk nen; hna pawh kal lovin ka awmpui chawt a. A chiri huna khuma a kut leh ke phuarbehna tur te chu amah nen kan siam ang lawp lawp a! :D
A zu chak a rawn chhuah dawn chuan min rawn ko chul a, rang takin ka phei vat a. Khumah chuan a lo mu kawm chal a, aw khur hlawk hlawkin,"Sangte, a....a rawn thleng dawn... Mi...Min rawn en suh awww.... Ka ku...kut hi..." tih pahin a kut leh ke phuarbehna tur chu min siam fel tir nawk nawk a.
Zu-chak chiri leh zu in a țhin let nat zia a takin ka tawng ve ta! Ka țap zawih zawiha, a bulah chuan ka țawngțai mawlh mawlh bawk a. A thlan chu a luang zawih zawiha, plastic dup ka seh tir te chu a khuar kawk kawk a! Khatiang em ema tawrhna nasa kha mihring taksaah ka la hmu ngailo a, hmuh pawh ka duh tawh hek lo!
A chauh tawpah a muhil a, a rawn harh veleh chaw ka eitir a. Ka intihfai tir a, a rawn țhin let leh hun atan kan inbuatsaih chhunzawm nghal țhin. Kei chuan chhunzawm twh loh mai ka duh a, khatiang em ema tawrhna nasa kha chu ka hmelma chunga thlengah pawh ka duh lo! A rapthlak hi a ni tawp!
Ka chhungte chuan min rawn kan awl lova, min țawngțaipui reng bawk a. Mahse Tetea duhdan angin a chiri lai chuan keimah chiah ka awm țhin. Chutiang chuan kar khat dawn kan awm ta!
A taksa cher țhiak mai leh a mitkhur tla dak maite chuan ka hnuk an ti ulh ngawih ngawih reng mai a! He zungawlveipa hi ka lo hmangaih hle ani tih ka hrechhuak chiang tawh hle!
Ei tui lo tih hriat zeta artui kan hawlh neuh neuh pah chuan min rawn en a,"Sangte, ka chhuak thei dawn lo aniang; ka beidawng țan ta!" a ti sap a. A ruka ka beidawnsan tawhin a lang a pauva a beidawn thu a sawi takah chuan beidawn ka phal leh bawk silo! Hmangaihna hi chu a mak teh e!
"Tete, vawikhat chauh tal ti leh ang hmiang? Kha chen i tuar tawh a, i paltlang theih ka ring tlat asin!"
A duh ang chuan ka chhungte nen chhungkaw kimin zanriah kan kil hova, chaw ei dawn chuan hunserh hman a rawt teh tlat a!
Bible chu a keu nuap nuap a, kan nghak țhap a. Rei fe hnuah chuan a rawn hawi chhuak a, zah vanga hmai sen ap ap chungin,"Pa, ka hmu zo miahlo!" a rawn ti chuak hlawl a! :D A chhiar khat hmel ka ti reng a! Ka lo nui leh huk hman tawh! :D
An inzawn hmuhsak hnu chuan a rawn ding chhuak a, Johana 2:1-11; Isua'n Kana khuaa inneihnaa Uain a tihpun thu kha a chhiar a. A chhiar zawh chuan Bible chu a pawm a, a mit a chhing a...
"Lalpa, keima chungchang bikah hian țawngțaina tam tak i dawng tawh a. Zanin hian thil tam tak rawn dil che ka tum lova, dil pawh ka la dil ngai lo bawk che a. Mahse, Lalpa, zanin hian ka mamawh takzet che ani! Min en la, bawksawp leh tur chuang awmlo khawpin ka chau chhe ta! Lalpa, ka mihring chakna chuan a tlin ta lo; vanah khian ila awm anih chuan thilmak pakhat chauh ka dil duh che... Vawi tamtak min hmangaihtute leh ka hmangaihte ka tina a. Lalpa, he zu um hi ka duh tawh lo; i kutah ka rawn hlan let a che...."
A ngawi vang vanga, tuma'n thawm kan chhuah lo! Ka mittui a rawn parawl țiam țiam a....
"Lalpa, hmanah Kana khuaa inneihnaah khan Tui kha Wine ah i chantir a. Lalpa, zanin hian i thiltihtheihna kha ala danglam lo anih chuan he Wine hi Tuiah chantir let leh tawh rawh; khawngaihin ka dil a che! Amen!"
Kan za chuan țap lo reng kan awm lo!
Chumi zan chuan na tak a tuar leh a, a tukah erawh a zia hret. A ni telin a zia hret hreta, Lalchhanchhuaha chuan Pathian vangin thilmak a ti a, thilmak a paltlang ta! Kum sang tam tak liamta a Isuan Tui Wine-a a chantir kha Isua nen Tuiah an chan let tir leh ta ani!
Ni e! Isua nen chuan theihloh a awmlo tih fiahtu kan ni a, a tawngtu kan ni ta bawk a. Pathian min pek in lian leh ropui takah chuan amah; ka pasal Tetea anga zu in a tihbuaite chuan Isua thiltihtheihna hmangin Wine chu Tuiah kan chan lettir mup mup mai nia! :)
In awih kher angemaw; kan gate chungah chuan lianpuiin "WITH JESUS; WE TURN BACK WINE INTO WATER" tih kan tar pek a! Ngeee?!! Tetea duhdan a ni miau alawm! :D
A aia in awih loh lehzual tur chu maw; Tetea kan vuiliam ni chuan zungawlvei leh zu ngawl lo vei tawh hlir rawn kalkhawm a! :o
Mahse, chanchintharah chuan sawrkar hotu lian leh mihmingțha tam takin Lalchhanchhuaha vuina hun an hmanpui thu an puang thung!.... :)
© Da Revd Peka Chhakchhuak
200820162052
