He thu i chhiar zawh hnu hian kei;a ziaktu hi min sawisel maithei!!
Dt. 18th November,2012 (sunday) khan kan veng presbyterian kohhran biakin ah kan bial Masihi Sanghati ten rawngbawlna/kohhran tlawh programme an rawn hmang a. Non-mizo kristiante leh masihi sanghati zaipawlte nen,hmuhnawm danglam takin rawngbawlna hun an rawn hmang a,mit leh beng a tlai in a ropui dangdai ve khawp mai.
Mizo deuh vek member an nih na zaipawl in vai khuang leh vai chhepchher chi hrang hrang nen (fakna) vai hla an rawn sa chhang chhang mai a,a ngaihnawm viau na in a awmzia phei chu kan hre lem hlei lova!
Ti hian ka ngaihtuahna chu a lo vak ta delh delh mai a.........
Biakin chhungah,hnam dang (ka trawng an huat thu suh ah) ten an hnam culture leh tradition/dress te nen Pathian an fak kan phalsak (kan welcome) em em a,ni e;van lal nau ang a trah na Kalvari ah chuan an dang chuang love,a tha vek e.
Mahse eng vang nge kan mizo culture,tradition leh dress te hi kan biakin chhungah an tlangtlat hleih theih tlat loh? Sap sendang kawrchung,necktie leh thildang dangte nen a in mawi em em lai hian ngatinge Zo nula vakiria thle nghiau nghiau hmuh tur a awm tlat loh?
Sap pa rimawi bungrua chi hrang hrang nen kan rik bung bung lai hian Zo pa seki khawn rik kauh kauh thawm ‘tinge hriat tur a awm ve loh? Vai khuan (tih tak em ah chuan Hindu ho pathian fakna khuang) pawh kristianna nen a nih phawt chuan kan pawm a,lamtual thleng thleng a kan mawi tir anih si chuan eng vang nge Zo seki,dar khuang leh dar bu te hian Zopa biakin a luh loh bik lem ang le?
Ka sawi zel dawn;a hua hua in haw teh se.....
Sap hla leh vai hla,love song ngialngan tak tak thluk hawh a Pathian fakna hla kan sa ngam (kan sak tir phal) ta rau rau anih chuan eng vang in nge Lalvunga Zai thluk hawh in -
“Setana’n ka kian a ti,khuavel a luah.
A luah sual e Krista’n kraws ah a hneh e..”
kan tih ngam loh bik ang?
Khing zawng zawng lo awm chhan leh a mei a chaih tu chu kan sap lemchang kohhran upa leh a tawl rel pha chin hruaitute an ni. Heng ho hian sap ngaihsan/sap lemchan hi hnualsuat ngam in Zo rimawi leh incheina te hi pwm thiam in welcome em em se chuan kan Pathian Biakin hi Pathian Zawkbuk ah kan siam thei ngei ang.
YMA kawr trial (thangchhuah kawr) hak vang ringawt hian ram leh hnam kan humhalh tluantling thei dawn lova,ngotekherh leh puanchei bih rikngawt pawh hian Mizoram a venghim
zo lul lo ang. Pawndum (puandum) awrh ringawt hian hnam a tuam dam zo ngai lo anga,khawi emaw YMA kalkhawm nikhua a,“Kan zotlang ram nuam hi chhawrpial run i iang e”,ti a zai rual thrup thrup leh zoram hi anmahni ta bik;midangte ta ni ve ta lo awm ang maia,“Zoram hi kan ram ani”,han tih deuh bik te pawh hian engtikah mah ram leh hnam humhalh kawngah hniak a hnutchhiah ngai lovang.
Hnam chim ral kan hlau a,kan duhlo takzet anih chuan ILP leh Burma unaute ringawt mai buaipui a tawk ta lo! Tun dinhmunah chuan kan kristianna ngei hi kan hnam nunphung leh incheina pawlh dal a,min chim ral mek tu chu ani.
Kan kristianna leh kan zo thil te kan belhbawm thiam loh chuan sap,korean leh vai lem chang in Bible nen vairampur kan pan thla mup mup anga,thangchhuah kawr leh puanchei mawi tak taka inthuam tlangval Kumar-a te,sap trawng kawi khat pawh a biak tlak loh nula Baby-i te kan la awm nawk ta ve ang.
© Copyrights Reserved by C. Vanlalpekhlua
